භූගෝලීය තොරතුරු පද්ධතියක් තුළ අඩංගු දෘඩාංග(Hardware),මෘදුකාංග( Software), මානව සම්පත්(Human Resources) සහ ක්‍රමවේද(Method)

භූගෝලීය තොරතුරු පද්ධතියක් තුළ අඩංගු දෘඩාංග(Hardware) 

මෙම දෘඩාංග ප්‍රධාන අංශ හතරකට වර්ග කළ හැකිය. 

1. පරිගණක (Computers) ,
2. ආදාන උපාංග (Input Device) ,
3. ප්‍රතිදාන උපාංග (Output Device),
4. ගබඩා උපාංග (Storage Device).

1. පරිගණක (Computers) 

භූගෝලීය තොරතුරු පද්ධති සඳහා භාවිත කරන පරිගණක අතුරින් PC (Personal Computers) පරිගණක මූලික මට්ටමේ ඒවා වන අතර සුපිරි පණිගණක (Super Computers) සහ පර්යන්ත පරිගණක (X- Terminal) ඉහළ මට්ටමේ පරිගණක වේ. භූ ගෝලීය තොරතුරු පද්ධතිය සඳහා ඉතා ඉහළ මට්ටමේ පරිගණක අවශ්‍ය වන්නේ විශාල ප්‍රමාණයේ දත්ත ගොනු හැසිරවීම මෙහිදී සිදුකෙරෙන බැවිනි. භාවිතයට ගනු ලබන පරිගණක ආශ්‍රිතව වැදගත් වන මූලික අංග 

දෙකක් වන්නේ පරිගණකයෙහි දෘඪ ඩිස්කය ( Hard Disk) හා සසම්භාවී ප්‍රවේශ මතකයයි( RAM- Random Access Memory) . විශාල දත්ත ප්‍රමාණයක් ගබඩා කිරීමට හැකි දෘඪ ඩිස්කය හා දත්ත ඉතාමත් කාර්යක්ෂමව සකස් කිරීමට හැකි වඩාත් වේගවත් සසම්භාව්‍ය ප්‍රවේශ මතකයක් සහිත පරිගණක පැවතීම හොඳ භූගෝලීය තොරතුරු පද්ධතියක් නිර්මාණය කිරීමේදී පූර්ව අවශ්‍යතාවක් වේ.

2. ආදාන උපාංග (Input Device) 

ආදාන උපාංග ලෙස යතුරු පුවරුව, මවුසය වැනි උපකරණද දත්ත ගබඩා කිරීමට යොදා ගන්නා චුම්භක තැටිද, දත්ත අංකනය කිරීම සඳහා යොදා ගන්නා අංකන ඵලකයද වැදගත් වේ. මේවා අතර අංකන ඵලකය(Digitizer table) සහ සුපරික්සන ( Scanners) ප්‍රධාන වේ. 

අංකන ඵලකය A₀ ප්‍රමාණයේ සිට A₄ දක්වා විවිධ ප්‍රමාණයන්ගෙන් යුක්ත වේ. අංකන ඵලකය සහ ඒ මත අලවන ලද සිතියමක අඩං A₄  ගු තොරතුරු පරිගණක ගත කිරීම සඳහා භාවිත කරන කර්සරය (Cursor) ලෙස මෙය ප්‍රධාන අංග දෙකකින් සමන්විත වේ. අංකන ඵලකය ප්ලාස්ටික් මතුපිටකින් හා අභ්‍යන්තරය ඉලෙක්ට්‍රොනික දැලකින් සමන්විත වේ. එම නිසා අංකන ඵලකය හා කර්සරය අතර සිදුවන අන්තර් ක්‍රියා ආධාරයෙන් සිතියමෙහි අඩංගු තොරතුරු ඛණ්ඩාංක බවට පරිවර්තනය කරමින් පරිගණකයෙහි දෘඪ ඩිස්කය මත ගබඩා කෙරේ. 

සුපිරික්සන විවිධ ප්‍රමාණයෙන් හා විවිධ වර්ගයෙන් සමන්විත වේ. ප්‍රමාණය අනුව A₀  සිට A₄  දක්වා පරාසයක වෙනස් වන අතර පැතිලි සුපරීක්සන මෙන්ම බෙර හැඩැති සුපරික්සනද භාවිත කෙරේ. සිතියමක පවත්නා තොරතුරු සුපරීක්සනය ආධාරයෙන් අනුරූපයක් බවට පත්කිරීමට හැකිවන අතර එය අවශ්‍යතාව අනුව JPEG, TIFF වැනි විවිධාකාර ආකෘතීන් යටතේ පරිගණකෙයහි ගබඩා කල හැකිය. අවශ්‍ය ආකාරයටඅනුරූපයෙහි විච්ඡේදනය පාලනය කිරීමේ හැකියාව පරිශීලකයා සතු වේ.

3. ප්‍රතිදාන උපාංග(Output Device)

තෙවන දෘඪාංග සංරචකය වන්නේ ප්‍රතිදාන උපාංගය නැතහොත් මුද්‍රණ යන්ත්‍රයයි. සිතියම් වල දෘඪ පිටපත් ලබා ගැනීම සඳහා මුද්‍රණ යන්ත්‍ර භාවිතා කරනු ලැබේ. Matrix, Inkjet/Bubbleject සහ Laser වශෙයන් මුද්‍රණ යන්ත්‍ර වර්ග රාශියක්ද Lasers, Electrostatic, Direct Thermal, Pen Plotters, Inject plotters වශයෙන් Plotters වර්ග කිහිපයක් ද පවතී.

4. ගබඩා උපාංග(Storage Device)

භූ ගෝලීය තොරතුරු පද්ධති හැසිරවීමේ දී ඉතාමත් වැදගත් වන තවත් දෘඩාංගයක් ලෙස ගබඩා උපාංග සඳහන් කළ හැකිය. දෘෂ්‍ය ඩිස්ක, චුම්බක ඩිස්ක, නම්‍ය ඩිස්ක හෝ චුම්භක පටි ලෙස මේවා දක්නට ලැබේ. විශේෂයෙන්ම විශාල දත්ත හැසිරවීමේ දී දත්ත ගබඩා කිරීමට මෙන්ම දත්ත රක්ෂිත ගොනු ලෙස ගබඩා කිරීමටද මෙවැනි ගබඩා උපාංග වැදගත්ය.

මෘදුකාංග( Software)

භූ ගෝලීය තොරතුරු පද්ධති ආශ්‍රිත මෘදුකාංග වර්තමානයෙහි ප්‍රධාන ධාරා දෙකක් යටතේ හඳුනා ගැනීමට පුළුවන. එනම්, වාණිජ මෘදුකාංග සහ විවෘත මෘදුකාංග වශයෙනි. Arc GIS, Map Info, Intergraph සහ Global Mapper වාණිජ ධාරාවට අයත් ප්‍රධාන මෘදුකාංග කිහිපයකි.

විශ්ව විද්‍යාල හා වෙනත් අධ්‍යයන ආයතන වාණිජ පරමාර්ථයකින් පරිබාහිරව නිෂ්පාදනය කරන ලද විවෘත මූලාශ්‍ර මෘදුකාංග නොමිලේ හෝ ඉතා අඩු මුදලක් වැයකොට ලබා ගැනීමට පුළුවන. GRASS, SAGA GIS, QUANTAM GIS සහ ILWIS ඒ අතරින් ප්‍රධාන වේ. ILWIS සහ IDRISI භූගෝලීය තොරතුරු පද්ධතිය සහ දුරස්ථ සංවේදය සඳහා උපයෝගී වන ඉතාමත් ජනප්‍රිය මෘදුකාංගයකි. එක් එක් මෘදුකාංග සතු ක්‍රියාකාරීත්වය හා අලෙවි ප්‍රවර්ධන කටයුතු විවිධ වන අතර ඇතැම් වාණිජ මෘදුකාංග වෙළඳපොළ දැඩි ලෙස ග්‍රහණය කරගෙන ඇත.

මානව සම්පත්(Human Resources) 

භූගෝලීය තොරතුරු පද්ධති තුළ අඩංගු මානව සම්පත් ලෙස එය භාවිත කරන්නන් නැතහොත් පරිශීලකයින් පෙන්වා දිය හැකිය.මානව සම්පත ප්‍රධාන වශයෙන් කොටස් තුනක් යටතේ දැක්වීමට පුළුවන. එනම්,

• ක්‍රියාත්මක කරවන්නන්,
• තාක්ෂණික වෘත්තකයාන්,
• කළමනාකරන සේවක මණ්ඩලය

ක්‍රමවේද(Method)

භූගෝලීය තොරතුරු පද්ධතියක අඩංගු තවත් වැදගත් සංරචකයක් වශයෙන් ක්‍රමවේද දැක්විය හැකිය. ප්‍රායෝගික ලෝකයෙහි පවත්නා වූ ඕනෑම ගැටලුවක් නැතිනමි කිසියම් සංසිද්ධියක් විද්‍යාත්මකව විශ්ලේෂණයකට බඳුන් කිරීමේදී ඒ සඳහා යොදා ගනු ලබන විද්‍යාත්මක ක්‍රමවේදයක් අවශ්‍ය වේ. එහිදී අවශ්‍ය වන දත්ත, ඒවා ලබාගන්නා මූලාශ්‍ර, එම දත්ත අදාළ අරමුණකට ඉටු කර ගැනීම සඳහා විශ්ලේෂණයට බඳුන් කළ යුතු ආකාරය විශ්ලේෂණය සඳහා යොදාගන්නා ක්‍රමවේද යනාදී වශයෙන් අනුගමනය කරනු ලබන ක්‍රියා පිළිවෙත මේ යටතේ විග්‍රහ කෙරේ. ඒ අනුව සරලව ක්‍රමවේද යනු අරමුණු ඉටු කර ගැනීම සඳහා භූගෝලීය තොරතුරු පද්ධතිය භාවිත කරමින් අනුගමනය කරනු ලබන ක්‍රියාමාර්ග ලෙස නිර්වචනය කළ හැකි වේ.